US Senate-in kum 28 hnuah silai khuahkhirhna tur bill pawm

United States Senate chuan silai khuahkhirhna tur, gun control bill chu kum 28 hnuah an pass ve thei ta.

Congress upper chamber, Senate-ah hian Republican 15-te chuan vote laknaah Democrats lam lungrual puiin, silai khuahkhirhna tur bill siam chu thlawptu 65 an awm thei ta a, a duh lo lamah vote 33 a tla bawk.

US-ah hian silai hmanga inpawng kahna a thleng fo a, hei vang hian tun hnaiah silai khuahkhirhna dan siam tura nawrna pawh a na hle. Thla hmasa khan Buffalo, New York leh Uvalde, Texas-a inpawngkahna thleng vangin mi 31 an thi a ni.

Senate-a vote lak hnua thuchhuah a siamah President Joe Biden chuan, "Kum 28 zet hma lak theih loh hnuah, Congress-a pawl pahnih member-te chuan ram chhunga chhungkuate ngenna ngaipawimawhin, kan khawtlanga silai hmanga pawikhawihna tireh turin bill an pass a ni," a ti. Uvalde leh Buffalo-a chhungkaw hrang hrang te, hemi hmaa silai hmanga pawikhawihna thleng tuartu hrang hrangte duh angin, silai khuahkhirhna siam tur hian an che chhuak thei ta tih President chuan a sawi.

House of Representative Speaker Nancy Pelosi chuan House lamah hian bill chu rang taka ngaihtuah ve a tiam a, hetih lai hian Republican leader Kevin McCarthy chuan an party member-te chu bill thlawp lo tur hian a chah thung.

Silai khuahkhirhna dan siam tharah hian silai lei tum, kum 21 aia naupangte background chu uluk taka enfiah tura tih a ni a, hei bakah hian mental health programme leh school security upgrade-na turin USD tld 15 ruahman a ni bawk. State-te chu mi dang nunna tiderthawng thei leh hlauhthawnawma an hriatte ralthuam chhuhsak theihna, red flag law an hman theihna tura sum ruahmansakna turte pawh a tel bawk.