Turkey thlawhtheihna chesualah mi pathum thi

Turkey thlawhtheihna Pegasus Boeing 737 chu Nilaini khan a ṭum hmun a thlen hnuah ding zo loin a tawlh tlang a, metre 30-40 vel a tlan liam a ni. A hmunah hian mi pathum an thih bakah, mi dang 179-in hliam an tawrh thu airport thuneitute chuan an tarlang.

Nilaini khan Boeing 737 hi Turkey-a Izmir khuaa Aegean port city aṭanga thlawkchhuakin, Istanbul-a Sabiha Gok­cen airport ṭum hmun (runway) a tlen hnuah a tlan chu a tawp hleihtheih loh avangin metre 60 vel a tawlh a, metre 30-40 a sangah a chesual zui ta a ni. Thlawhtheihna hi a chhe hneh hle a, hmun thumah a bung hial a ni. 

Khawchhiat vangin runway hi a nal niin an sawi a, hei vang hian thlawh­theihna hi a ding lawk thei lo nia a sawi a ni bawk. A ṭum hunlai hian thli leh ruah nasa tak a sur thu tarlan a ni bawk. Thlawhtheihnaa chuang ṭhenkhat chu hliam na lutuk tuar loin anmahnia an rawn chhuah theih thu tarlan a ni.

Thlawhtheihnaah hian passenger 177 chuang­in naupang 12 an tel a, crew member 6 an chuang tel bawk.