NKorea-in missile enchhin chhunzawm zel a tum
North Korea senior official chuan, US nen an inkar boruak ṭha loin, khawvel ram hrang hrangten missile an enchhin ṭhin chu an dem thu sawi mah se, missile enchhin chu chhunzawm zel an tum tih a sawi.
NKorea Vice-Foreign Minister Han Song-ryol chuan amah kawmtu BBC palai, John Sudworth hnena he thu hi sawiin, “Missile hi kar dan, thla dan leh kum danahte kan la enchhin zel dawn a ni” a ti. US nen an inep meknaah, US sorkarin a sipaite chakna hmanga hma a la a nih chuan indona a chhuak ngei dawn niin a sawi bawk.
Han chuan BBC palai hnenah, “US hian a sipai hmanga min beih a tum a nih chuan, keimahni style leh method hmangin nuclear ralthuam nen kan che ve thung dawn a ni”, a ti. NKorea hian ramdangten an dem chung leh, UN in a hrek chungin nuclear leh missile-te a enchhin chhunzawm reng a ni. A ram ṭhenawm bakah, US thleng pawha kap phak tur nuclear ralthuam siam chu a tum ber a ni a, mahse US President Donald Trump chuan he thil hi a thleng ngai dawn lo niin a sawi a, NKorea chu a nuclear programme titawp turin na takin a nawr mek a ni.
US President hian NKorea a vauna kawng khat atan Korean Peninsula-ah navy strike group pawh a tir tawh a, NKorea ramri bul, SKorea ram chhunga missile defence system dah a tum pawh rang zawka dahfel a nih theih nan hma a la mek bawk.
US nena an inkar boruak a chhiat chhoh mek laiin, Pathianni khan NKorea hian missile a enchhin leh a, mahse kahchhuah a nih aṭanga second reiloteah a puak zui a ni. Hei bakah hian a ṭum rukna atan nuclear pawh enchhin leh a tum nia sawi a ni.
South Korea acting president Hwang Kyo-ahn nena press conference an neihnaah, US Vice President Pence chuan NKorea chu President Trump-a enchhin tum lo turin a ti a, “Kar hnih kalta chhung khan kan President tharin Syria leh Afghanistan-a a theiha a lantir dan chu khawvelin a hria a ni”, tiin US chuan zaah zain South Korea chu a thlawp tih a sawi bawk.
Asia ram hrang hrang tlawha zin mek, US Vice President Mike Pence chuan Pathianni khan SKorea leh NKorea ram pahnihte inri-naa demilitarized zone a tlawh a, NKorea chu US fiah tum lo turin a vau. Pence chuan NKorea chunga an dawhtheihna hun chu a liam tawh niin a sawi a ni. Thla hmasa khan US Secretary of State Rex Tillerson chuan NKorea chuan an vaunate a zawm lo a nih chuan sipai chakna hmang theih reng an nih thu a lo sawi tawh bawk.
Thawhṭanni khan UN-a NKorea permanent representative ambassador Kim In-ryong chuan Syria sorkarin helho a beih nana chemical ralthuam a hmang nia sawi vanga US-in missile hmanga Syria airbase a bei chu a dem thu a sawi. Kim chuan US chuan khawvel muanna a tichhia niin a puh a ni.