Palestinian jail tangten Chaw ngheiin nawrh huaihawt

Israel jail-a Palestinian mi tang 1,000 chuang chu enkawl an nih danah lungawin, chaw ngheiin nawrh an huaihawt.

Palestinian tangten nawrh an huaihawt hi mi panga thah vanga thiam loh chantir, Palestinain hruaitu Maran Barghouti-a’n a ho a ni. Barghouti-a hi Palestinian Authority President Mahmoud Abbas-a thlak theitu tura rinkai zing ami a ni. Tangten nawrh an huaihawt hi West Bank-a Palestinian mite chuan an thlawpna an lo lantir tawh a, Bethlehem-ah Israel security force-te an tibuai a ni.

Israel Prison Service thupuangtu, Assaf Librati chuan nawrh huaihawtte chu thunun an ni dawn tih a sawi a, an hotu Barghouti pawh dahhran nghal a nih thu a sawi. Barghouti hi central Israel-a Hadarim Prison aṭangin hmarlama Kishon detention centre-ah sawn a ni.

Tangten an thil phut hrang hrang an tarlan zingah, tan-in chhunga public telephone leh air conditioning dah te, tangte chu lehkhabu, chanchinbu, thawmhnaw leh ei tur an kawl phalsak te bakah an chhungten an tlawh phalsakte a tel a ni.

Israel-in dan a hman mek hnuaiah jail tangte hi kar hnih danah an chhungten an tlawh phalsak an ni. Mahse West Bank-a Palestinian te hian Israel luhna turin permit an neih phawt a ngai a, permit an dilna hi Israel thuneitute chuan an hnawlsak fo a ni. Permit pek an nih pawhin tang tlawh turte chu tan-in pawn lamah darkar rei tak takte nghah tir an ni fo ṭhin.

Tangte hian mumal taka an hriselna endik sak ṭhin tur te, Intertional Red Cross-in an tlawh theih zat chu tihpun sak turtein an phut tel bawk.

February thlaa Israel Prison Service record-a a lan danin, Israel rama tan-in hrang hrangah hian Palestinin mi 6,820 an tang mek a, an zingah hian kum tling lo tam tak an tel a ni. An zinga a tam zawk hi Israel-in West Bank leh Gaza Strip a luahsak duh lohna lantira nawrh huaihawta telte an ni.