Taliban-in fund an hrensakte pe chhuak turin US ngen

Afghanistan-a rorellai, Taliban chuan an rama lirnghing na tak thleng vanga chhiatna tawkte ṭanpui an nih theihna turin, US hnenah foreign fund a hrek sak chu titawp tur leh, sum lama a hrek mekna hlip turin a ngen.

Taliban foreign minister Amir Khan Muttaqi chuan Inrinni khan he ngenna hi siamin, 'Hun harsa tak kan tawh mekah, US chu Afghanistan sum khawih chet theih loha a hreksakte pechhuak tur leh, Afghan bank ho a hrekna pawh hlip turin kan ngen a ni," a ti.

US-in Afghanistan-a Taliban-ten thuneihna an chan hnua Afghan thil neihte a hreksak USD tld 9 chuang zinga USD tld 7 pek chhuahna tur thupek chu kumin February thla khan US president Joe Biden chuan a lo ziak fel tawh a ni. Heng sum pek chhuahte hi Afganistan-a chhawmdawl hna thawhna atan leh, 9/11 tuartute ṭanpuina turin sem a ni.

Kar liam ta Nilainia Afghanistan rama magnitude 5.9-a lir nghing kha an ram chhim chhak lama province pahnih, Paktika leh Khost-ten an tuar nasa hle a, chhungkaw 700-800 vel chu chenna nei loin, kawtthlerahte an khawsa mek niin UN chuan a sawi. Hei bakah hian an in chhe kher lote pawh lir nghin nawn leh an hlauh avangin an inah hian an awm zui ngam rih lo niin UN thuchhuah chuan a tarlang. Taliban sorkar leh chhawmdawl hna thawktu pawl hrang hrangte chuan lirnghing tuarte ṭanpui hna hi an la thawk chhunzawm zel tih UN chuan a sawi.