Kyiv-ah ṭum eng emaw zat bomb a puak

Ukraine khawpui, Kyiv-a central Shevchenkivskiy district-ah nimin zing khan ṭum eng emaw zat bomb a puak a, chhiatna nasa tak thlenin mihring chenna inah kangmei a chhuak bawk. Official-te chuan June thla hnua Ukraine khawpui beih a nih leh ṭum khatna a ni tih an sawi.

Emergency service-te chuan Russia sipaite beihna vang hian mihring chenna building, chhawng kuaa sangah kangmei a chhuak tih an sawi a ni.

Kyiv mayor Vitali Klitschko chuan building pahnih aṭangin chhanchhuah hna hi kalpui a nih thu sawiin, "Building chimin a delh hmeichhe naupang kum sarih mi chu nungdamin an chhanchhuak tawh a, a nu chhanchhuah tumin hma an la leh mek a ni," tiin mi ṭhahnem takte chu damdawi-in panpui an nih tawh thu Telegram kaltlangin nimin khan a sawi.

Khawpui chhungah hian siren tihrikin nunphung a tikhaihlak fo a, mahse April thla tawp lama Radio Liberty producer chenna an kah ṭuma a thihna leh June 5-a khaw daifema rail car repair facility an kah hnuah erawh khawpuiah hian inbeihna lian tham a thleng zui leh tawh rih lo.

Nimina bomb puahna, Shevchenkivskiy district hi Kyiv khawpui lun lai leh university, restaurant leh art gallery awm khawmna hmun a ni.

Russia chuan February 24 khan Ukraine hi a run ṭan a, mahse khawthlang ramte'n ralthuam chakna hmanga an puih avangin Kyiv lak tuma an beihna chu an chawlhsan leh nghal a ni. Hemi hnu hian Russia leh a thawhpuite chuan Ukraine chhim lam leh khawchhak lama Luhansk leh Donetsk awmna, Donbas bialah ralthuam ṭhahnem tak chaw lutin, Indopui pahnihna hnua Europe rama lei lam inbeihna nasat ber ṭum a thleng hial a ni.