June 8-ah Britain inthlang dawn

Britain Prime Minister Theresa May-i chuan Parliament inthlanpui chu kumin June 8-ah neih a nih tur thu a puang.

Britain mipui tam zawkin European Union chhuahsan an duh thu vote hmanga an tihlan hnuah, Brexit plan hi kalpui a ni tawh dawn a ni. Hemi atan hian PM May-i chuan a tha tihchak a ngai niin a sawi a, chak zawka hma an lak theihna turin inthlanpui neih phawt hi a ngai a ni, a ti.

Sorkar dinglai hian a term chanve pawh ala hmang zo lo a, inthlan hun tur pangngai chu kum 2020 daih a ni. Hei vang hian PM-in inthlan neih tur thu a puan hian mak tih a hlawh hle. Mahse Britain danah chuan, Parliament term kallai tihtawp chungchang hi Parliament thuneihna a ni a, hei vang hian PM thupuan pawh hi Parliament-in a pawmpui ve leh phawt a ngai dawn a ni.

May-i hi PM atan nikum July16 khan lakluh a ni a, mahse tuna eptu party-te dinhmun a thlirin EU chhuahsan an tumna kawnga an hmalakna an tihbuai a hlauh thu sawiin, ngun tak a ngaihtuah hnuah inthlan buatsaih a, sorkar thar hnuaiah huai leh chak zawka kal theih a ni dawn niin a sawi.

PM May-i chuan thutluka siam hi a minister-te pawhin an thlawp niin a sawi a, Thawhṭanni khan Queen Elizabeth pawh a lo hriattir tawh niin a sawi bawk.