Israel-in Palestinian tang nawrh huaihawtte biak tum lo

Israel chuan an ram jail hrang hranga tang, Palestinian mi chaw ngheia nawrh huaihawtte chu inbiakna neihpui a tum lo tih a sawi.

Israel jail-a tang mek, Palestinian mi 1,000 chuang chuan enkawlna ṭha zawk pek phutin chaw ngheiin nawrh an huaihawt mek a, nawrh huaihawt hi mi panga thah vanga damchhung tang tura hrem Palestinian hruaitu Marwan Barghouti-a’n a ho a ni. Hei vang hian thuneitute pawhin a tanna hmun pawh an sawn tawh a, Jalama tan-inah sawn niin midang nen inpawh thei lo tura dah hran a ni.

Israel Public Security Minister Gilad Edran chuan tang nuar mekte inbiakna neihpuina chhan tur an neih loh thu a sawi. “Heng mite hi firfiak leh tualthattute an ni a, an chan hi an phu tawk a ni” a ti.

Hetih lai hian tang nawrh huaihawt mek hi West Bank-a Palestinian-te chuan an thlawpna a lantir a, Bethlehem-a Israel security force-te chu ṭhalai ṭhenkhatin an tibuai a ni.

Palestinian Committee of Prisoners Affairs chuan nawrh huaihawtte hi tihluihna hmangin jail dangah a sawn darh niin a sawi a, an thawmhnaw leh thil neih dangte pawh a lakkhawm sak vek a ni, a ti.