Venezuela-a kawngzawhnaah buaina chhuak

Venezuela President Nicolas Maduro duh lohna lantir a, an ram khawpui Caracas-a kawngzawh huaihawtnaah buaina a chhuak a, zirlai pahnih an thi a, Miranda state-a nawrh huaihawtnaah national guard sergeant kahhlum a ni bawk.

Nawrh huaihawtte hian President chu democracy palzut leh an ram sum dinhmun chhiat chhanah an puh a, Nilaini khan lungawi lohna kawngzawh hi an huaihawt a ni. He kawngzawh hi eptu pawlten an thlawp a, a kawngzawh hi ‘mother of all marches’ tiin an vuah a ni. Kawngzawhte hnawh darh nan hian security force-te chuan tear gas an hmang a ni. Nawrh huaihawt zinga mi 400 chuang chu hren an ni. Hemi ni vek hian Maduro-a thlawptute chuan Caracas-ah hian kawng an zawh bawk.

President Maduro chuan eptute chu Venezuela ram inrelbawn tichhia a, sorkar paihthlak tumah a puh a, hetihlai hian eptute chuan Maduro chu dictator ang maia a chet tawh thu leh, a kaihhruai sorkar chuan tharum thlawhna thlen turin civil mite chu ralthuam nen a chettir niin a puh.

Eptu hruaitu Henrique Capriles chuan nawrh huaihawt hi chhunzawm an tum thu leh, tel pawh an pun zel tur thu a sawi.

Nilaini-a kawngzawhte hian khawpui chhung hmun hrang hrang aṭangin Ombudsman office an pan a, mahse kawng lakah security force-te hian an lo dang a ni. President Maduro-a dodaltu leh thlawptu te inkarah pawh buaina a chhuah belh zel a hlauhthawnawm hle nia sawi a ni.