Japan-a mipui maktaduai 37 te kawlphetha renchem turin a ngen

Japan sorkar chuan nimin khan Tokyo leh a chhehvela cheng mipuite chu nimin khan kawlphetha renchem turin a ti. An ramin khaw lum tak an tawrh mek avangin, kawlphetha an renchem loh chuan supply lamah harsatna a thlen palh thei tih a sawi.

Ministry of Economy, Trade and Industry chuan mipuite hian ṭul loa light tih en ṭhinte chu titawp turin a ti a, mahse khawlum lutuk avanga harsatna an tawh lohna turin air condition erawh an hman theih thu a sawi.

Official-te chuan an ram khaw lum lamin zual lan a pan avangin kawlphetha lama indaih lohna a thlen mai a hlauhawm thu an sawi a ni. Kar liam ta khan central Tokyo-a khaw lum lam hi 35C a kai chho a, Tokyo hmarthlang lama Isesaki khuaah chuan 40.2C tlingin, hei hi June thlaa Japan khaw lum ber ṭum a ni.

Pathiannia thuchhuah an siamah, ministry chuan nimin chawhnu aṭang khan Tokyo leh a chhehvela prefecture pariatah kawlphetha siamchhuah chu 3.7% vela a tlakhniam thu a sawi.

Sorkar chuan mipuite chu tlai dar 3 hnu lam aṭang chuan ṭul loa eng chhi lo tur leh boruak lum zual laiin air condition leh taksa vawng dai thei lam hmang uar turin a chah a ni. Eng pechhuaktute'n theihtawpin supply tih tam tum mah se, khaw lumin zual lam a pan zel avangin an dinhmun tur hi sawilawk a harsat thu an sawi.

Kumin March thlaa lirnghing avanga hmarchhak biala nuclear power plant ṭhenkhat khar a nih avangin Japan hian power supply lamah indaih lohna hi a tawk a ni. Official-te chuan carbon dioxide tihchhuah tihtlem nan hun rei tak chhung an lo hman tawh fossil fuel plant ṭhahnem takte pawh an khartir tawh a ni.

Tun thla tir khan Japan sorkar chuan chenna in leh company-te chu nipui July-September hun chhung chu theih ang tawka eng renchem turin a lo ngen tawh bawk.