Venezuela eptuten nawrh chhunzawm

Venezuela eptute chuan President Nicolas Maduro-a ban phuta ram puma nawrh an huaihawt chu an chhunzawm zel.

Nilaini khan President Maduro-a duh lohna kawngzawh huaihawtah buaina chhuakin mi pathum an thi a ni. Ningan khan nawrh hi huaihawt chhunzawm a ni a, mahse a hma ni aiin mipui pungkhawm erawh an tlem tawh zawk a ni.

Mipui lungawi lote chuan President chu democracy palzut a, an ram sum dinhmun chhiat chhanah an puh. Venezuela ram hian sum lamah harsatna nasa tak a tawh avangin ei leh in tur pawh duh khawp an nei lo a, damdawi lam pawh an mamawh ang hmuh tur a awm loh vangin mi tam takin an thih phah niin an sawi.

Eptu lam chuan nawrh huaihawtte dang turin sorkar chuan gang-te a chhawr niin an puh a, hetihlai sorkar lam chuan eptu pawl nawrh huaihawtte hian naupang 54 awmna damdawiin an bei niin an sawi thung.

UN Secretary-General Antonio Guterres chuan pawl hnihte chu inbengdai a, boruak ṭha siam tura hma la turin a ngen. European Union pawhin nawrh huaihawt zinga thi an awm chu an dem thu a sawi a, hemi rual hian buaina a punlun zel lohna tura hma la turin pawl hnihte chu a ngen bawk.