US-in WikiLeaks founder Julian Assange-a man duh

US Attorney Ge­neral Jess Sessions chuan WikiLeaks founder Julian Assange-a man chu US-in a thil ngaihpawimawh ber zingah a tel thu a sawi.

Sessions chuan WiliLeaks in US thuruk hrang hrang a puanzar sak chung­chang chu an ngaihtuah mek tih a sawi a, hetianga thuruk tam tham tak a putru hi an ngaihtuah phak bak a nih thu leh, heng zinga ṭhenkhat chu thil serious tak a nih thu a sawi.

Prosecutor-te cuan tunhnaiah Assange leh WikiLeaks member-te thubuai siamsak dan tur an ngaihtuah mek a, thubuai siamsak zingah US phiarrua puhna te, sorkar thil pawimawh ru chhuaka puhnate pawh a tel dawn niin media report chuan a tarlang.

Kum 45 mi, Assange hi Sweden-ah pawngsual thubuai a nei mek a, mahse kum 2012 aṭang khan London-a Ecuador embassy-ah ala khawsa a ni. Sweden sorkar chuan a thubuai ngaihtuah a nih theih nan an rama thawn turin UK a ngen fo a, mahse Assange hian Sweden-a thawn a nih chuan heta ṭang hian US thuruk tam tak a tihputruk chungchangah a thubuai ngaihtuah tura US-ah an thawn mai a hlau a ni.

Hun eng emaw chen US lama a thawm a reh hnuah, nikum November thlaa president thlanna an neih ṭum khan WikiLeak hi a inrawlh leh a, Democratic party candidate Hillary Clinton-i email hack aṭanga mail an hmuh theihte chu a puanzar sak leh a ni. US official-te chuan inthlanah inrawlh tur hian Russia sorkar puihnain email-te hi hack an ni tih an sawi.