Paris-a inkahna thlengah police officer thi

France ram khawpui, Paris-a Champs-Elysess-ah Ningani zan khan mi pakhatin police-te silaia beiin police officer pakhat a kaphlum a, mi dang pahnihin hliam an tuar. Pawikhawihtute hi police-te’n an kaphlum ve nghal a ni.

Islamic State (IS) firfial pawl chuan pawikhawihna thleng hi an pawl tih niin an chhal a, police-te beitu chu an pawl sipai Abu Yousif, Belgium mi a nih thu an sawi.

Paris police thupuangtu Johanna Primevert chuan pawikhawihtu hian Franklin Roosevelt sub-way station vengtu police officer te chu a bei niin a sawi a, he hmun hi bazar hmunpui leh khualzinten an tlawh nasat hmun a ni. Thurualpui a nei lo nia a lan thu a sawi bawk.

Police leh sipaite chuan pawikhawihna thlenna hmun hi an khar nghal a, khualzinte pawh an hotel lama kir tura hriattir niin, mipuiin an tlawhpawh theih loh turin an dang a ni.

Paris prosecutor office chuan pawikhawihna thlen dan hi chhui chian nghal a nih thu a sawi a, police officer-te beitu chanchin hi kimchanga hriat a la ni lo niin a sawi. Pawikhawihna thleng vang hian nimin zing khan France president Francois Hollande chuan emergency meeting a ko nghal a ni.