Ahmadinejad-a’n president chuh thei dawn lo
Iran president hlui Mahmoud Ahmadinejad-a chu an ram president thlan thurah a chuh ve thei tawh dawn lo.
Thuneitute sang, Guardian Council chuan May 19-a president thlan tura chuh tumte a enfiahnaah, Ahmadinejad-a hi disqualify a ni. Hei bakah hian president hi hmeichhiaten an chuh phal a ni dawn lo bawk. President chuh tum dang, president ṭanglai Hassan Rouhani leh midang panga-te erawh pawm an ni.
Guardian Council hi inthlan chungchanga thuneitu sang a ni a, parliament-in dan a pass hrang hrang pawh a pawmpui ve zel a ngai a ni. Council hian president inthlanah hian hmeichhiaten an chuh ve a remtih loh bakah, sorkar kalphung sawiseltuten chuh an tumna pawh a hnawlsak fo ṭhin.
President candidate tura pawm tur zingah hian president ṭanglai Rouhani bakah Senior Vice President Eshad Jahangiri, culture minister hlui Mostafa Mirsali, vice president hlui Mostafa Hashemitaba te pawh an tel.
Candidate aṭanga hnawl tak, Ahmadinejad-a hi kum 2005-2013 chhung khan Iran president a ni a, an ram hotu lu ber Khamenei pawhin president inthlan neih tura hian chuh tawh lo tura a ngen avangin kar hmasaa chuh tuma a hming a thehluh pawh khan mak tih a hlawh hle. Mahse Ahmadinejad-a chuan avice president hlui Hamid Baghaei-a’n inthlan chuh a tumna chu hnawlsak a nih avangin a thlawpna lantirna atan hian ama hming hi a thehlut ve leh niin a sawi.