Afghanistan sipai hmunpui beihnaah mi 140 thi

Afghanistan-a Balkh province khawpui, Mazar-i-Sharif-a army base chu kar kalta Zirtawpni khan firfiakten an bei a, mi 140 an thi. Thi zat hi an la punchhoh rin an ni. Army base beihnaa thite hi nimin khan ram pumah sun an ni.

Army base beitute hi Taliban firfiak an ni a, sipai uniform hain an lut a, sipaite inring lo lai chu an pawng kah a ni. Tualchhung media-te chuan thi zat hi 150 an tling a, mi 80 chuangin hliam an tuar bawk niin an tarlang.

Sipai thi te sunna leh an puala ṭawngṭaisakna hun hi nimin khan Presidential Palace mosque bakah, ramchhunga mosque hrang hrangah neih a ni a, hnam puanzar chu a ngul chanve-in zar a ni.

Sipai beitute hian document lem an hmang a, army base chhungah thihchilh bomb pahnih an tipuak a, hemi ni hian sipaite nen hian darkar li vel an inkap zui a ni.

Kar kalta Inrinni khan President Mohammad Ashraf Ghani chuan pawi­khawihna thlenna hmun hi a tlawh a, base-ah hian emer­gency meeting a ko nghal bawk. Hemi hnu hian Corps hospital-ah hliam tuar enkawltute chu a tlawh a ni.