US aircraft carrier bei turin NKorea inpeih

North Korea chuan an chakna tihlanna turin US aircraft carrier kah pilsak turin a inbeih tih a sawi.

US President Donald Trump chuan NKorea-in nuclear leh missile a enchhin zel avanga boruak ṭha lo awm chho mek avangin Korean peninsula-ah aircraft carrier, USS Carl Vinson chu kal turin a ti a, kar hmasa khan US navy lawnglian pahnihin an zui ve bawk a ni. North Korea-a rorellai, Workers Party chanchinbu, Rodong Sinmun chuan an sipaite chuan ṭum khatah US aircraft carrier chu an kah pil sak thei a ni tiin, hemi titur pawh hian an inpeih reng thu a sawi.

Rodong Sinmun chanchinbu chuan US aircraft carrier chu ramsa hlauhawm tak angin a tehkhin a, lo kah pil sak chu an sipaite theihna lantirna hun ṭha tak niin a tarlang.

North Korea hian Thawhlehni hian Korean People’s Army din champha vawi 85-na a lawm dawn a, kum dangah chuan he hun lawmna pual hian a ralthuam neihte a enchhin ṭhin a, kuminah hian eng angin nge a lawm dawn tih erawh a la tarlang lo.

NKorea hian tunhnaiah nuclear test ṭum nga a nei tawh a, pahnih hi nikuma a enchhin niin, US kap pha thei tur missile siam a tum mek nia sawi a ni bawk. Hei bakah hian US in a hrekna palzutin ballistic missile pawh ṭum tam tak a lo enchhin tawh bawk.