Sri Lanka-ah ni tin mamawh phur lirthei tan chauh petrol pe chhuak dawn

Sum lama harsatna nasa tak tawk mek, Sri Lanka chuan nitin mamawh phur lirtheite hnenah chauh petrol a hralh chhuak dawn. Motor dangte chu petrol an lak phal a ni dawn rih lo.

Kar hnih chhung chu medical service leh eitur phurhna atana hman lirtheite chauhin fuel hi an la thei dawn a ni.

Urban area-a school-te chu khartir an ni tawh a, official-te chuan an rama hnathawk mi maktaduai 22-te chu in aṭanga thawk turin a ti tawh bawk.

Ei tur leh fuel lakluhna tur sum a neih tawh loh avangin Sri Lanka hian an harsatna laka khaichhuah an nih theih dan tur a buaipui mek a ni.

Thawhṭanni khan sorkar chuan mimal lirtheite chu July 10 thleng petrol leh diesel lei khap an ni dawn tih sawiin, sorkar thupuangtu Bandula Gunewardena chuan, Sri Lanka ram chanchinah tun anga economy lamah chhiatna an la hmachhawn ngaih loh thu a sawi.

Sri Lanka hian energy siamtu ram lian, Russia leh Qatar-te hnena man tlawm zawka oil an supply theih dan tur ngaihtuahin official-te a tir mek a ni.

Ram dang aṭanga mamawh lakluhna tur sum a neih tawh loh avangin ram chhungah ni tin mamawh hmanrua, eitur, fuel leh damdawi lam indaih lohna a thleng mek a, khawsak man pawh a hautak sawt tawh hle.

Official-te chuan kar liam ta khan essential service atana hman tur diesel tonne 9,000 leh petrol tonne 6,000 chauh an neih tawh thu an sawi. An hman dan pangngaih chuan fuel khawl khawmsa hian kar khat vel bak a daih tawh lo a ni. "Stock thar neih tumin theihtawpin hma kan la mek a, mahse eng tik hunah nge a rawn thlen dawn kan hre lo," tiin power and energy minister Kanchana Wijesekera chuan a sawi.

May thla khan Sri Lanka chuan an leiba te an rulh theih loh avangin a vawi khatnan ramdang aṭangin ṭanpuina a dil tawh a ni. Kar hmasa khan, International Monetary Fund team-te chuan Sri Lanka hi tlawhin tlanchhuahna tur sum, bailout deal USD tluklehdingawn thum puk turin inbiakna an neihpui a ni. Sri Lanka sorkar hian India leh China aṭangin essential item lalut turin ṭanpuina an dil mek bawk a ni.

Prime minister Ranil Wickremesinghe chuan tun thla tir khan, thla ruk chhungin an ramin nitin khawsak atana an mamawh, fuel leh damdawi lakluhna turin thla ruk chhungin USD tld nga tal an mamawh thu a lo sawi tawh a ni. Kar liam ta chhung khan sorkar chuan loneitute chu buh lam chi ching uar turin a chah a, sorkar official-te pawh buh hmun siama hna an thawh theihna turin kar k hatah ni khat office chawlh a pe bawk.