Texas-a bungraw phurhna motor-ah mihring ruang 46 hmuchhuak

San Antonio, Texas daifem lama bungraw phurhna, lorry rauhsanah Thawhṭanni khan mihring ruang 46 an hmuchhuak.

Fire official chuan he motor-ah hian ruang ṭhahnem tak bakah mi dang mi 16 an lo awm bawk nia sawiin, an zingah hian naupang pali an tel tih a sawi. Dam chhuak an hmuhte boruak uap leh lum lutuk avangin an taksa lamah harsatna an tawk a, damdawi-inah dah luh nghal an ni.

Ruang 46 zet an hmuhna, San Antonio hi US-Mexican ramri aṭanga km 250 velah a ni a, mihring hmanga sumdawng ṭhinten an kawng hman ber a ni. Mihring hmanga sumdawng, human trafficker-te hian document nei loa United States-a lutru ṭhinte phurh kualna atan lorry-te hi an hmang ṭhin.

San Antonio-a ruang tam tak awmna lorry hi a driver hian tlanbosanin, a chhungah hian air condition a awm loh bakah tui in tur pawh a awm lo niin fire hotu Charles Hood chuan a sawi. San Antonio hi nipui lai chuan a lum thei hle a, Thawhṭanni pawh khan khaw lum lam hi 39.4C a tling a ni.

Mexico foreign minister Marcelo Ebrard chuan damdawi-in panpui zingah Guatemala mi pahnih an tel tih a sawi a, midang erawh an nihna leh chanchin kimchang hriat tur a la awm lo. He thil thleng kaihhnawihah hian mi pathum hren mek an ni a, federal agent-te chhuizui turin hlan a ni nghal bawk.