US tuihnuai lawngin SKorea a thleng
US tuihnuai lawng chuan nimin khan South Korea-a Busan lawng chawlh hmun a thleng ta.
Missile phurtu, USS Michigan hian a hmaa Korean peninsula-a lo dah tawh, thlawhtheihna phurtu indo lawng Varl Vinson chu a zawm ve dawn a ni.
Hetih lai hian North Korea chuan nimin aṭang khan an ram sipai din champha vawi 85-na a lawm. Kum dangah chuan army foundation lawmna pual hian missile a enchhin ṭhin a ni.
Tun hnaiah US leh North Korea inkar boruak a ṭha lo chho hle a, ṭawngkam pawhin an invau na sawt hle. Vawiin hian White House-ah NKorea chungchang ngaihtuah a ni dawn a, he hunah hian US Senate pum chu tel vek tura hriattir an ni. US President Donald Trump chuan NKorea-in nuclear program a kalpui chhunzawm zel avangin UN Security Council ambassador-te chu hrekna na zawk siamsak dan ngaihtuah turin alo nawr tawh bawk.
Nimina South Korea-a thleng US Michigan hian Tomahawk cruise missile 154 bakah, special opreration troop 60 a phur tel a ni. Carl Vinson indo lawng hoa nunchan zirhonaah a tel ve nghal dawn a ni. President Donald Trump chuan tuihnuai lawng an tirh hi a chak hle tih sawiin, aircraft carrier aia thiltithei zawk a nih thu a sawi.
US chuan Korean Peninsula-ah aircraft carrier Carl Vinson hi a lo dah tawh a, hei hi NKorea chuan a ngaimawh hle a, kap chhe tur pawhin a inpeih niin a lo sawi tawh a ni.
China hian ram pahnihte inkara boruak ṭha lo zawk a chhuah lohna turin inbengdai turin a ngen tawn a, boruak tichhe thei thil te chu pumpelh hram turin a ngen.
Nimin khan Tokyo-ah Japan, South Korea leh US nuclear palaite an inhmu a, NKorea hian chet a thawh leh a nih chuan na taka hrek a nih tawh tur thu an sawi. Ram pathum palaite hian China leh Russia chu NKorea nuclear program titawp tura na zawka nawr turin an phut bawk a ni.