France election : NF hruaitu aṭangin Le Pen a bang

France President thlan thawh hnihna hmachhawn tur, National Front (NF) party hruaitu Marine Le Pen-i chuan party hruaitu a nihna aṭanga a ban thu a sawi.

May 7-a President thlan thawh hnihna neih turah hian Marine Le Pen leh centrist Emmanuel Macron-te an inhmachhawn dawn a ni. Macron hi chak zawk tura rinkai ni mah se, Le Pen-i chuan hnehna an chang thei a, an chang ngei dawn bawk niin a sawi.

Le Pen-i chuan President chu ram mipui zawng zawng aiawhtu tur a ni tih sawiin, hei vang hian France president candidate a nih angin National Front president a nihna aṭangin a ban thu a sawi. He thutlukna hi an party bil chauh ni lo, ram mipui zawng zawngte a ngaihtuah vang niin a sawi.

Hetihlai hian economy minister hlui Emmanuel Macron chu inthlan thawh hnihna neih turah chak tura ngaih a ni a, President Francois Hollande pawhin Macron hi a vote tur thu a sawi tawh a ni. Kum 39 mi, Macron hian president thlan hi a la chuh ngai lo a, tun ṭumah hian thlan tlin a nih chuan France president ni thei zinga naupang ber a ni ang.