SKorea-in US THAAD system part dah lut ṭan

US leh South Korea-in NKorea-in missile hmanga a beih tur venna atana South Korea ram chhim lama Terminal High-Altitude Area Defense system an dah tur thu an sawi hnuah, THAAD system part ṭhenkhat chu nimin khan dah ṭan a ni ta.

Hetih lai hian THAAD system dahna tur, South Korea chhim chhak biala chengte chuan missile defence system dah tur hi an duh lo a, police-te nen an innawr buai hle. Police-te chuan THAAD dahna turhmun kawng lo dangtu, tualchhung mi leh peace activist pungkhawmte chu an hnawtdarh a, pungkhawm zinga paruk chuan hliam an tuar a ni.

THAAD system dah tur hian nikum July thla khan US leh SKorea hian inremna an lo siam tawh a, a dahna tur hmun hi nikum September thla khan South Gyeongsang province-a Seongju county-a Lotte Group golf course-ah thlak a ni. Hei hi South Korea khawpui, Seoul chhim lam km 250 vela hlaa awm a ni. He hmuna dah tur hian March 6 khan US transport airplane hmangin South Korea-a US military base-ah mobile launcher pahnih leh THAAD part ṭhenkhat thlen a ni tawh bawk.

Hemi hnu hian a rukin THAAD part-te hi SKorea lawngchawlh hmun, Busan-ah sawn a ni. THAAD battery-ah hian mobile launcher paruk, interceptor 48, AN/TPY-2 radar leh fire & control unit an awm a ni.

Nimin zing dar 4.44 vel khan truck pariat leh hmanraw dangte chuan gold court hi an thleng a, a hnu darkar hnih velah bungraw dang phurtu US truck-te an thleng ve leh bawk. THAAD part-te hi US truck 20 hmanga phurh a ni.

North Korea chuan an ramri bula THAAD system dah tum hi na takin a lo sawisel tawh a, China pawhin sawiselin a radar hian an ram chin a man phak dawn avangin an ram security thlengin a tiderthawng thei niin a sawi.