France mayor-in Muslim chungchang a sawi avangin sum chawi
France ram chhim lama Beziers khaw mayor chuan an khuaa school hrang hrangah Muslim naupang an tam lutuk tia a sawi chu sakhaw thila inhuatna chawk chhuak thei a ni tiin, euro 2,000 chawi tir a ni.
Beziers Mayor Robert Menard hi an rama pemlut phalna pek dodaltu, National Front party thlawptu a ni.
Nikum September 1-a school luh ṭan a nih khan Mayor Menard hian an khuaa school hrang hrangah danglamna nasa tak a hmuh thu a sawi a, a hnu September 5-a LCI TV-in an kawmnaah, class pakhatah naupang zinga 91% chu Muslim an nih thu leh, hei hi ngaihtuah tham tak a nih thu a sawi a, muslim-te luh an phalsak chuan chin tawk a neih a ngai niin a sawi.
France danah hian sakhaw behchhanah data siam chu khap a ni a, hei vang hian Mayor Renard pawh hi a thusawi avang hian a lakah complaint thehluh a ni. Mahse Menard chuan an khaw dinhmun a sawi mai tih sawiin, thudik a ni a, a hmuh dan ang a sawichhuak mai tih a sawi.
Paris court chuan Menard-a laka thubuai puluttu, anti-racist group court kal man senso euro 1,000 chawi turin a ti bawk. Mahse Menard chuan court sang zawkah appeal a tum thu a sawi a ni.