US-in nuclear talk neihpui turin NKorea nawr leh tum
Unitd State (US) sorkar chuan North Korea chuan a nuclear programmee titawp tura inbiakna neihpui chhunzawm leh turin a nawr dawn tih a sawi.
US Secretary of State Rex Tillerson leh Director of National Intelligence Dan Coat-te chuan ram dangte pawh inbiakna chhunzawm a nih theih nan NKorea ram nawr chhunzawm turin an ngen tih an sawi.
Pacific Commando hotu, Admiral Harry Harris chuan US leh NKorea inkar boruak chhe chho zual tihreh tuma China hmalakna chu lawmawm a tih thu a lo sawi tawh a, sipai chakna hmang loa an buaina chinfel dan kawng zawn chu thil ṭha ber a nih thu a sawi bawk.
Harris chuan kawng hrang hranga hmalak dan chu an ngaihtuah reng tih sawiin, North Korea ram hotu Kim Jong-un chu an hmaa ṭhingṭhit tir an tum lo a, a ngaihtuahna fim hmang tura an duh zawk thu a sawi.
US President Donald Trump chuan Thawhṭanni khan White House-ah UN Security Council ambassador-te chu chaw chhun a ei pui a, he hunah hian NKorea chu an ngaihven zui zel tur thu leh, a ṭul a nih chuan sipai chakna pawh hman a ni mai thei tih pawh a sawi a ni.
National security adviser HR McMaster chuan UNSC ambassador 15-te hnenah hian NKorea chuan inbiakna neih hi a duh lo a nih chuan sipai hmanga an buaina chinfel pawh a ngai maithei niin a sawi.
Hetih lai hian NKorea-in missile leh nuclear hmanga a ṭhenawm South Korea leh ramdangte a vauna ṭhin laka invenna atan US leh SKorea chuan Nilaini aṭang khan NKorea ramri bulah anti-missile system, Terminal High Altitude Area Defense (THAAD) system part a dah lut ṭan a ni. THAAD system hi SKorea chhim lam, Seongju-a golf course-ah dah luh a ni a, he biala chengte hian hei hi duh loin an lo dodal a, police-te nen an intibuai a ni.
Harris chuan THAAD system hi ni reilote hnuah hman ṭan a nih tur thu a sawi.
US hian Nilaini khan California-a Vanderberg Air Force Base aṭangin intercontinental ballistic missile a enchhin. Minuteman 3 rocket hi hlawhtling taka kahchhuah niin, mel 4,200 a thlawh hnuah South Pacific-a Marshall Island-ah test range-a target chu a fuh a ni.