China FM-in Myanmar tlawh dawn

China foreign minister Wang Yi chuan tunkar chhung hian Myanmar a tlawh dawn a, hei hi Myanmar sipaiten civil sorkar thuneihna an hnehchhuh hnuah China ram mi pawimawhin a tlawhna hmasa ber tur a ni.

China hi Myanmar tana ralthuam supply-tu lian leh, Myanmar sipai thawhpui ṭha tak a ni ṭhin. Sipaiten nikuma civil sorkar an paihthlak pawh kha thuneihna hnehchhuh tiin a sawi sak duh lo. Khawthlang ramten Myanmar sipai sorkar hrekna an siam hnuah, Myanmar sipaite hian China leh Russia thawhpuina ṭha zawk siam tumin a bei ve mek a ni. April thla khan China chuan Myanmar chu eng dinhmunah pawh ding se, ro a in relna, an ram chhunga a thu neihna humhalh leh venhim pui turin a pui dawn tih a lo sawi tawh bawk.

Hetih lai hian khawvel huap erawh chuan Myanmar hian thlauhthlak a hlawh chho tawh hle. Sipaiten thuneihna an chan hnuah Cambodia hruaitu Hun Sen chauh chu ram dang hruaitu tlawhtu an neih chhun a ni. February thlaa Association of Southeast Asian Nations (ASEAN) summit-ah pawh Myanmar sipai sorkar foreign minister chu a kal khapsak a ni.

Wang Yi hi Lancang-Mekong Cooperation foreign minister meeting-naah a tel dawn niin Myanmar sipai thupuangtu Zaw Min Tun chuan a sawi. An rama a cham chhung hian Wang hian sipai hotu lu Min Aung Hlaing meeting a neihpui dawn em tih erawh an la sawichian theih loh thu a sawi.

Lancang-Mekong Cooperation foreign minister meeting hi July 2-5 chhung neih a ni dawn a, Cambodia, Thailand, Laos, Myanmar leh Vietnam foreign minister-te an tel ang.