Colombia tanina buaina chhuakah mi ṭhahnem tak an thi

Colombia chhim thlang lama Tulua khawpui tan-in chhungah Thawhṭanni zan khan intihbuaina thlengin kangmei a chhuak zui a, mi 49 an thi a, mi dang eng emaw zatin hliam an tuar bawk.

National prisons agency hotu general Tito Castellanos chuan buaina chhuahna chhan tak hi hriatchian a nih loh thu sawiin, thil dang thupna atana buaina siam nge an nih tih te, an tlanchhuah theihna atana tangte chuan an awngphahte chu an hal zawk nge tihte chhui chian mek a nih tih a sawi. Buaina chhuaka thite hi tang vek an ni em tih leh, tang zingah tlanchhuak an awm em tih pawh chhui mek a ni, a ti.

Hetih lai hian National Penitentiary and Prison Institute thupuangtu chuan tan-in aṭanga tlanchhuah an tumnaah mi tangte hi an thi niin a sawi thung.

Colombia president kal chhuak tur Portugal tlawha zin mek, Ivan Duque pawhin Tulua tan-ina thil thleng chu pawi a tih thu sawiin, he thil thleng hi chhui chian a nih tur thu a sawi.

Tulua tan-inah hian tang 1,267 an awm mek a, kangmei chhuahna cell block-ah hian mi180 an awm. Colombia rama tan-inte hi a tawt thei hle a ni. Ram pumah an tan-inte hi mi 81,000 len theihna a nih laiin, tunah hian tan-in hrang hrangah mi tang 97,000 vel an awm mek tih official chuan a tarlang.