Mipui lungawi loten Macedonia Parliament luhkhung

Macedonia Parliament-in Speaker atana Albanian mi an thlan tlin avangin Ningani khan mipui lungawi loten Parliament building hi luhkhungin tharum thawhna an thlen a, mi tam takin hliam an tuar. Hliam tuar zingah hian Social Democrat hruaitu, Zoran Zaev pawh a tel.

Nawrh huaihawtte hi Prime Minister Nikola Gruevski-a party, VMRO party thlawptute an ni a, inthlan ṭhat an phut.

Nikum December inthlanpuiah khan PM hlui Gruevski-a party hian hnehna chang mah se, party malin sorkarna a siam thei lo a ni. Ṭangrual sorkar siam tumin hma a la mek a, an la hlawhtlin theih loh avangin sorkar nei loin an la awm a ni.

Ningani khan eptu pawl Social Democrats leh Albania hnam aiawh pawlte chuan Parliament speaker thar atan hian Albania mi, Albanian Democratic Union for Integrations-a senior official Talat Xhaferi an rawt a, thlan tlin a ni zui a ni.

Macedonia khawpui, Skopje-a Parliament beitute hian ṭangrual sorkarin Albania mi speaker atana an thlan hi duh loin, an rama Albania mite dinhmun sang zawk pek chu an ram inpumkhatna thlenga a nghawng pawi theih tur thu an sawi. Parliament luhkhungte zinga tam tak hian an hmai an tuam a, hallway-ah nasa takin an intibuai a ni.

Police-te chuan mipuite hnawh darh nan stun grenade an hmang a, parliament building aṭang hian venhimna hnuaiah politician-te chu hruaichhuah an ni. Building luhkhungtu tam tak hian an ram puanzar-te an keng lut a ni.

Macedonia-a US embassy chuan eptute chet dan chu a dem thu sawiin, democracy kal­phung anih loh thu leh, inhriatthiam lohna awmte chu tharum thawhna hmanga chinfel chi a nih loh thu a sawi.

NATO secretary general Jens Stoltenberg chuan pawikhawihna thleng chuan pawi a tih thu sawiin, party hrang hrangte chu democracy kalphung zawm a, tharum hmang lo a, inbiakna hmanga an harsatna neihtechingfel zawk turina ngen.

European Union Commissioner Johannes Hah pawhin Parliament-ah chuan tharum thawhnain hmun a chang tur a ni lo, a ti.

Macedonia President Gjore Ivanov chuan buaina a chhuah hnu hian TV-ah thu sawiin, miputie chu inbengdai turin a ngen a, nimin khan political party hrang hrang hruaitute chu meeting a neihpui nghal bawk.