Israel PM Bennett-a'n inthlanah din a tum tawh lo

Israel prime minister kal chhuak tur Naftali Bennett chuan an ram inthlanpui neih turah din a tum tawh lo niin a thupuangtu chuan a sawi.

PM Bennett kaihhruai ṭangrual sorkar hian kumin kumtawp lama inthlanpui buatsaih a nih theihna atan an ram Parliament, Knesset ṭhiah a ni dawn tih a lo puang tawh a ni. Mahse MP zingah Parliament ṭhiah tum chungchangah an inlungrual loh avangin vote hi an la la lo a ni.

Right-wing, liberal leh Arab party-te thawhhona ṭangrual sorkar hi a tir aṭangin a dinhmun a nghet lo sa nghal a ni. Sorkar siam thei tura seat neih ngai zat an tlin tawk vel chiah avang leh, policy thila ṭanhmun in ang lo tak takte thawkho an nih avangin an lungrual hlei thei lo. Palestinian statehoood pek chungchang te, West Bank-a Israel ram luah chungchang te, ram chhung inrelbawl leh sakhaw lam thilahte party pariat thawhhna ṭangrual pawlte hi an inhmuthiam thei lo a, member-ten an chhuahsan ṭhen avangin majority pawh an nei pha tawh lo a ni.

Parliament ṭhiah a nih hunah inthlan neih hun tur hi puan a ni thei dawn a, kumin kum tawpah neih tum a ni. Mipui ngaihdan lakah prime minister hlui, tuna eptu lam hruaitu ni mek Benjamin Netanyahu chu a rawn chak chhoh leh rin a ni. Netanyahu hian an thawhpui, right-wingers, ultra-nationalists leh ultra-Orthodox Jewish party-te nen chuan hnehna an chang leh ngei dawn niin a sawi. Mahse majority nei phak erawh chu a harsat hle rin a ni thung.

Hetih lai hian Netanyahu thlawptu lamte chuan Parliament ṭhiat kher loa sorkar thar siam dan tur an ngaihtuah mek tih an sawi. An hlawhtling thei a nih chuan inthlan ṭhat buatsaih kher a ngai dawn lo a ni.