Taliban-in intawhkhawmnaah hmeichhia tel remti lo

Afghanistan-a Taliban sorkara deputy prime minister, Mawlawi Abdul Salam Hanafi chuan sakhaw thila intawhkhawmna lo awm turah hmeichhiate tel tir an ni dawn lo tih a puang.

Kabul-a Loya Jirga Hall-a sakhaw lama mithiam, tribal hotu, sumdawng leh mi thiam dangte tana intawhkhawm buatsaihah hian mi 3,000 vel an tel dawn a, mahse hmeichhia erawh an tel dawn lo tih Deputy PM chuan a sawi a ni. "Hmeichhiate chu kan nute, kan farnute niin kan zah hle. Mahse intawhkhawmah hian an fapate an tel avangin anni pawh tel ve ang tho an ni," a ti. Intawhkhawmnaah hian mipate chu hmeichhe aiawhin an kal a, hmeichhiate aiawhin thu pawh an sawi dawn a ni, a ti bawk.

Taliban-te thiltih dan hi civil society hrang hrang chuan an sawisel nghal a, hmeichhiate tel ve phal lohna intawhkhawm buatsaih chu dan kalh a ni, an ti.

Afghanistan-a Taliban-ten thuneihna an chan hnuah hmeichhiate lakah khuahkhirhna an siam chho nghal a, hmeichhiate chu secondary school an kal khapsakin, Hijab khum danah thupek khauh tak an siam tawh bawk. Hei bakah hian hmeichiate chu an chhungte mipa tel loin khawlaia chhuah leh zin chhuah an khap a, hmeichhiate chu an hmelhmang khawih danglam lo tur leh make-up hmang lo turin an ti bawk a ni.