UK-in Ukraine sipaite ṭanpuinan pound tld 1 pek an tum

Britain chuan Ukraine sipaite'n Russia hmalakna te an do let theihnan ralthuam chak leh ṭha zawk leina tur pound tluklehdingawn khat ($tld 1.2) an pek tur thu Nilaini khan a puang a, an pek tur zingah hian air-defence system leh drone-te pawh a tel.

Britain-in ṭanpuina sum a pe leh a nih chuan Russia-in February thlaa Ukraine an run hnuah Ukrane tan pound tld 2.3 an pe tling tawh dawn tih Downing Street thuchhuah chuan a tarlang. Ukraine ṭanpuina a pek thar tur zingah hian air-defence system, uncrewed aerial vehicle, innovative new electronic warfare equipment leh vital kit ṭhahnem tak a tel a ni.

Britain prime minister Boris Johnson chuan Vladimir Putin-a'n Ukraine a beihnaah a beisei leh rin angin ram a la chak thei lo a, hei vang hian a chetdan pawh a nunrawng sawt tawh hle niin a sawi. "UK ralthuam, equipment leh training-te chuan indona thleng mekah Ukraine-in a lo inven theihnate chu a tichak sawt a ni," tiin "Ukraine-ah Putin a hlawhchham theihnan Ukraine mipuite tan kan ding zel dawn a ni," a ti.

Britain hi Ukraine hnena military kit pechhuak hmasa ram zinga mi niin, Russia chhan letnan anti-tank missile pawh an thawn tawh a, Ukraine sipaite training pekna kawngah pawh a thawh hlawk hle a ni.