France president election Marcron leh Le Pen inhmachhawn dawn
France President thlan thawh khatna neih zawh takah candidate zingah tling tura vote hmuh ngai zat, vote tla aṭanga 50% hmu phak an awm lo. Candidate zinga vote hmu sang pahnih, Emmanuel Macron leh Marin le Pen-i te chu May 7-ah inthlan thawh hnihna an hmachhawn dawn ta a ni.
Pathianni-a inthlan thawh khatna neihah hian beisei aiin vote a tla ṭha a, vote nei mi maktaduai 47 awmin, vote tla hi 69% a tling phak.
Emmanuel Macron hi minister hlui leh centrist En Marche! party hruaitu a ni a, Le Pen-i hi far-right National Front party hruaitu a ni. Candidate pahnihte awmna party hi party lian an ni lo ve ve. Macron chuan vote hmu sang berin, vote tla aṭangin 23.9% a hmu a, Le Pen hian 21.4% a hmu thung.
President thlanah hian candidate 11 an awm a, an zingah hian minister hlui leh conservative Repubican party hruaitu Fancois Fillon, far-left La France Insoumise party hruaitu Jean-Luc Melenchon-te an tel a, anni pahnih hian vote tla aṭangin 20% ve ve an hmu a, inthlan thawh hnihna an hmachhawn pha ve ta lo a ni.
Macron hi kum 39 mi chauh a ni a, investment banker hlui a ni. Kum 2006-2009 chhung khan Socialist Party member niin, kum 2012 khan Francois Hollande-a sorkarah deputy secretary-general atan dah a ni a, kum 2014 khan Minister of Economy, Industry and Digital Affairs a enkawl. Kum 2016 khan a nihna aṭanga bangin president chuh tur hian a inbuatsaih zui a ni. Kum 2016 April thlaa a din, En Marche! party ticket-a president thlannaah a chuh tur thu hi nikum November thla khan a lo sawi tawh a ni.
Marine Le Pen-i hi kum 1968-a piang a ni a, lawyer niin National Front party president a ni. Kum 2004 atanga kumin thlengin European Parliament-ah member a ni a, 2011 khan party president atan thlan tlin a ni. Kum 2012-a France president thlanaah khan chuhin vote 17.90% a hmu a, Francois Hollande leh Nicolas Sarkozy-te a pha lo a ni.