Duterte-a’n Muslim firfiakte a vau

Philippines President Rodrigo Duterte chuan tunhnaia an mi mante lu tansaktu, Muslim firfiakte chu vauin, anni aia rawngin a che thei tih a sawi. President chuan, firfiakte hi sipaiten nungchunga an man a nih chuan a ei ral vek thei ang tihialin a vau.

Duterte hian an rama ruihhlo do beihpui a thlak mekah ṭawngkam na tak tak lo hmang tawh ṭhin mah se, tun ṭum anga aṭawng chhuah nasat hi a la awm ngai lo.

Bohol province-a pawikhawih tum Muslim firfiak tlanchhiate chu that vek turin sipaite chu thu a pe a, firfiakte chu ramsa tia koin, a hnenah chuan a nung chunga thlen lo turin a ti. He thu hi Pathiannia national sports tournament hawnna inkhawma thu a sawinaah a sawichhuak a ni.

‘Ramsa anga awm tura min duh a nih pawhin ka ti thei a, kan inang reng a ni. In thiltih ang kha a let 50 a nasain ka ti thei a ni’ tiin an rama pawikhawihna thlenṭhin firfiakte chu a vau.

Duterte chuan firfiak mante chu a hnena an rawn thlen a nih chuan chi leh vinegar nen an thin a lo eisak mai theih thu a sawi bawk.

Bohol province-a inbeihna thlenga mawhphurtua puh, Aby Sayyaf leh firfiak dangte lu man tur lawmman ṭha tak pek tur pawh president hian a lo puang tawh a ni. He pro­vince-a inbeihna thlengah hian sipai pathum, police pakhat leh tualchhung mi pahnih an thi a ni.