Tuilian vangin Kaziranga Park-a ramsa 51 thi

Assam-a tuilian  chuan Kaziranga National Park a chim nasa tawh hle a, Park chhunga ramsa 51 chu tuilianah hian an thi tawh a, ramsa 100 chuang chhanchhuah an ni tawh bawk. Tuilian hian Kaziranga Park hmun 95% vel a chim a, he park kaltlanga National Highway-37 vela motor tlan vel pawh a nghawng buai hle a ni. 

Kar liam ta chhung khan ruah nasa taka a sur chhunzawm avangin tuilian hian zual lam a pan leh a, state chhunga district 33 zinga district 27 chuan tuilian hi tuarin, mi nuai 22 velin harsatna an tawk a ni. Thawhṭanni khan mi paruk an thih belh leh a, kumina tuilian vanga thi hi mi 50 an tling tawh. State chhunga lui lian 13, Brahmaputra lui telin hlauhawm chhinchhiahna an la pel vek a, tuilian tuar mi 60,000 chuang chu sorkarin relief camp 480-ah an awm mek bawk. Tuilian hian thingtlang khaw 763 a chim tawh a, thlai chinna ram hectare nuai khat chuanga zau a chim chhe tawh bawk.