NKorea-in an rama Covid-19 darh chhanah South Korea puh

North Korea chuan nimin khan an rama Covid-19 hri darh ṭanna chu South Korea nena an inrina bula bungruate an khawih vang tih sawiin, an rama hri len chhanah an ṭhenawm ram chu an puh.

KCNA news agency chuan chhuichianna an neih thu sawiin, North Korea mipuite ram dang aṭanga thliin thil a rawn chhem luh leh, ramri aṭanga balloon rawn lutte laka fimkhur a, uluk taka thlithlai turin a chah. Agency hian South Korea chu a hming hmerhin sawi lang lo mah se, SKorea-a activist-te chuan ramri aṭangin NKorea ram lamah hian leaflet leh thil dang dahna balloon chu NKorea ram lamah an chhuah fo ṭhin a ni.

South Korea-a unification ministry, inter-Korean affairs khawihtu chuan ramri kaltlanga leaflet an thawn hmangin NKorea-ah hri a darh theihna chhan a awm lo tih a sawi ve thung.

KCNA tarlan danin, sipai kum 18-a upa leh naupang kum nga mi te chuan April thla tir khan an ram chhim lam, Kumgang-a sipai riahna,barrack leh residential quarter-ah bungrua hriat loh an khawih hnuin symptom an nei a, a hnuah coronavirus an kai tih finfiah zui a ni, a ti. Hetih lai hian U.S.Centers for Disease Control and Prevention chuan bungrua leh hmanrua khawih aṭanga Covid kai theihna chu a hniam thu an sawi.

An ram khawchhak lama bungrua khawih avanga Covid-19 hri kai hmuh chhuah hmasakte hi April thla tir lama thleng niin NKorea chuan a sawi a, mahse defector group-te chuan SKorea ramri kaltlanga kumina NKorea ram lama balloon an thlawh luh tir hmasa ber chu April thla tawp lamah chauh a ni tih an sawi thung a ni.

NKorea chuan Covid-19 hri leng chuan ziaawm lam a pan zel tih an sawi a,mahse mithiamte erawh chuan sorkarin a thunun media-ten hri kai zat an tarlante chu a dik tawk loh an rin thu an sawi thung. Nimin khan NKorea-ah hian khawsik nei report 4,570 an awm belh leh a, heng mite nen April thla tawp lam aṭanga khawsik nei an record tawh hi mi nuai 4.74 an tling tawh. Report-ah hian khawsik neite chauh tarlan a ni a, mahse testing kit lamah indaih lohna an neih avangin Covid kai an nih leh nih loh sawi lan a ni ngai lo thung.