US Supreme Court-a mihang hmeichhe judge hmasa ber Ketanji Brown Jackson

Mihang hmeichhe zinga US Supreme Court justice hmasa ber ni turin Ningani khan Ketanji Brown Jackson chu lakluh a ni. Kum 51 mi, Jackson hi court justice 116-na a ni.

Kum 2013 aṭanga federal judge hna lo chelh tawh Jackson hian a hmeichhiat pui mi dang pathum, Justice Sonia Sotomayor, Elena Kagan leh Amy Coney Barrett-te chu zawmin, an pali hian member pakua awmna court-ah an ṭhu ho dawn a, a ṭum khatna atan Supreme Court-ah hian hmeichhe jugde pali an awm dawn.

Nilaini khan kum 1994 aṭanga Supreme Court-a lo thawk tawh, kum 83 mi Breyer-a chuan a chawlh tawh tur thu a puang a, Ningani khan Jackson hi lakluh nghal a ni. US president Joe Biden chuan February khan Breyer thlak turin Jackson hi a lo ruat tawh a, US Senate chuan April thla khan Supreme Court judge atana Jackson rawtna hi pawmin, a thlawp lamah vote 53 tlain, thlawp lo lamah vote 47 a tla thung. Vote laknaa hian Republican pathumte chuan President Biden-a rawtna chu thlawpin, Democrats leh independent ṭan lamah an thlak a ni.