Covid-19 vangin health worker 3,000 chuang thi tawh
Amnesty International chuan khawvel ram hrang hrangah hripui leng mek, Covid-19 vangin healthcare worker 3,000 chuang an thi tawh tih report a tihchhuah thar berah a tarlang.
Hripui vanga healthcare worker thi tamna ber hi Russia niin mi 545 an thi a, UK-ah 540 (social worker 262 huam telin) leh US-ah 507 an thi bawk. Mahse heng hi report lut dan aṭanga tarlan a nih thu sawiin, report kim loh eng emaw zat a awm an rin thu leh, hri vanga damdawi lam hnathawktu thi hi an tarlan aia an tam hle a rinawm thu a sawi nghal bawk.
Amnesty researcher Sanhita Ambast chuan hripui leng hi a la hluar chhoh zel avangin sorkar hrang hrang hnenah health leh essential service lama thawktute chu ngai pawimawh tura an ngen thu a sawi. Hri leng dona kawnga a hma tawngtu ber, healthcare worker-te chu ram tam takah ngaihsak an ni tawk lo nia sawi a ni a, hri kaite enkawlna atana an mamawh face maks, gown, glove leh goggle hman tur an pe ṭha tawk lo nia sawi a ni. Hei bakah hian ram 63 ah PPE an indaih lo hle niin Amnesty chuan a tarlang bawk.
World Health Organisation (WHO) chuan khawvela Covid-19 leng chuan zual lam a la pan zel a, khawvel chu a dinhmun pangngai angah khan eng tikah nge a awm leh dawn tih hriat mai theih a ni lo, a ti. Hri leng mek chungchangah ram hrang hrangten invenna chu ṭha taka an vawn loh chuan, khawvel dinhmun chu a la chhe zual zel dawn a ni, tiin WHO hotu Tedros Adhanom Ghebreyesus chuan Geneva aṭanga virtual briefing a neihnaah a sawi a ni.