Ukraine leh Russia-in Lysychansk khawpui thununtu niin insawi ve ve

Ukraine khawchhak lama Lysychansk khawpui chu inbeihna hmunpuiah chang mekin, Russia leh Ukraine sipaite chuan khawpuiah thuneihna an chan tawh thu an sawi ve ve.

Ukraine sipaite chuan Russia nen inbeihna hautak tak an hmachhawn mek a, mahse khawpui erawh an la thunun loh thu a sawi. Hetihlai hian, Russia lam chuan hlawhtling takin khawpui an luh tawh thu leh khawpui laili lam an thleng tawh tih an sawi thung.

Russia media-te chuan Russia sipaiten khawpuia kawng an zawh lai leh khawpui chhung hmun pawimawhah Soviet flag an tar thu an sawi a, mahse a finfiahna tur erawh a la awm lo.

Lysychansk hi Luhansk, Donbas region-a Ukraine thuneihna hnuaia khawpui awmchhun a ni tawh. Russia chuan thla hmasa khan Severodonetsk khawpui chu an lo chhuhsak tawh a ni.

Ukraine president Volodymyr Zelenksyy-a adviser chuan Russia sipaite'n beihpui nasa tak an thlak chhunzawm zel avangin Lysychansk chu an thuneihna hnuaia awm a ni tawh loh tih an pawm mai a ngai tih a sawi. Oleksiy Arestovych chuan Russia sipaite'n Siversky Donets lui an kan tawh thu sawiin, khawpui hmar lam aṭangin an rawn lut ṭan tawh a ni, a ti.

Kumin February 24-a Russia-in Ukraine a run aṭang khan civil mi leh sipai ṭhahnem tak chu indonaah hian an thi tawh a, Ukraine mi maktaduai 12 vel chuan himna zawngin an in an tlanchhuahsan tawh bawk.