Covid-19 test tamna ber ram US : Trump

US president Donald Trump chuan an ram chu tun dinhmuna Covid-19 hri kai leh kai loh hriat theihna tura test tamna ber ram an nih thu leh ram lian Russia, China, India leh Brazil-te ai pawha test an neih tam zawk thu a sawi.

'Ram dangah chuan Covid-19 hri kai an test-in a tlangpuiin natna nei tawh leh damdawi-in pana kalte chauh test an ni ṭhin. Hei vang hian ram dangte chuan hri kai case an neih tlem phah a ni," tiin Trump chuan an rama hri kai hmuh chhuah a tam chhan a sawi a ni. 

US-ah chu hri kai hmuh chhuah tamna leh he hri vanga thi tamna ber ram a ni chungin, hri kai hmuh chhuah aṭanga chhutin hripui vanga thi zat rate chu a hniam hle tiin Trump chuan a sawi. US chu khawvel ram zingah testing programme nei ṭha ber ram a ni a, an rama test an neih zat ang chu China, Russia emaw India-ah emaw nei ve se hri kai hmuh chhuah hi rin phak bak an ni ang, a ti. 

Hripui leng mek beihna kawngah hian US chuan hna a thawk ṭha hle a ni, tiin Trump chuan a sawi. US-ah hian Covid-19 hri kai hi mi 34,79,650 an awm tawh a, he hri vanga thi hi mi 1,37,000 chuang an awm tawh bawk.