Nigeria-a biakin aṭangin Isua lo kal leh hun nghak ; Mi ṭhahnem tak chhanchhuah an ni

Nigeria chhim thlang lama awm, Ondo state-a biak-in pakhatah police te chuan mi 77 an chhanchhuak. Ṭhenkhat chu biak-inah hian thla thum chuang an tang tawh a ni.

Police thupuangtu chuan heng zinga mi tam tak chuan April thla khan Isua Krista lo kal lehna chu a thlen dawn thu hrilhin he biak-inah hian lo nghak tura tih an ni, a ti. An zingah hian naupangte pawh telin school-te an bansan phah a ni.

Nu pakhatin a fate chu hun eng emaw chen an bo tawh thu leh, biak-inah hian an awm nia a hriat thu a complaint hnuaah, police-te chuanValentino area-a Whole Bible Believers Church hi dapin, mi ṭhahnem tak lo awmkhawm hi an va hmu ta a ni.

Police-te chuan he thil thleng hi inrukba lam a ni em tih chhuizui a nih thu sawiin, biak-ina pastor David Anifowoshe leh a deputy chu an man nghal a ni. An mi chhanchhuahte hi thuneitute kutah hlan nghal an ni bawk.

"Chhuichhianna in a tarlan danin, biak-ina Pastor Josiah Peter Asumosa, assistant pastor ni bawk chuan April thlaah Isua Krista lo kal leh hun a thleng dawn tih a sawi a, mahse a hnuah September 2022-ah zawk a nih tur thu a sawi leh a ni, tiin police press officer Funmilayo Odunlami chuan a sawi. Police-te hian naupang 26, tleirawl pariat leh puitling 43 an chhanchhuak tih an sawi.