Brazil president-in quarantine a ning tawh

Brazil president, Covid-19 hri kai mek Jair Bolsonaro chuan hri a kai vanga inkhung hran reng ngai chu a nin tawh thu sawiin, hri hi a la kai em tih test a neih leh vat tur thu a sawi.

Telephone hmanga CNN Brazil-in an kawm­naah Bolsonaro chuan in lama rilru nuam lo deuha awm chu hrehawm a tih thu a sawi a, hri hi kai mah se a ziaawm tawh thu te, khawsik leh thawk lama harsatna a neih loh thu te, a leiin a thlum, a al a hriathran vek thu leh engmah a taksaa hri natna lang chhuak a awm loh thu te pawh a sawi a ni.

Hri hi test nawn leh a ni a, a lo negative chuan hnathawk tura a inpeih nghal thu kum 65 mi Bolsonaro chuan a sawi. Khung hran hi ning viau mah se, hri a lo la kai reng a nih erawh chuan ni rei lote chhung awm hran leh a ngaih dawn thu a sawi bawk. 

Bolsonaro hian hri laka a dam theih nan hian hydroxychloroquine a ei ṭhin thu a sawi a, hydroxychloroquine hi WHO bakah ram dangten Covid-19 kaite enkawlna kawngah damna a thlen loh thu an sawi thung a, WHO thurawn angin ram eng emaw zatin hri kai enkawlna atana an hman pawh an lo titawp tawh a ni.