Sri Lanka tuialhthei khawlkhawmsa a zo dawn

Economy lama harsatna lian tak hmachhawn mek, Sri Lanka ram energy ministry chuan an ramin tuialhthei khawlkhawmsa an neih chu a zo dawn hnai tih a sawi.

Pathianni khan Minister Kanchana Wijesekera chuan petrol chu dan pangngaia an hman ṭhin angin ni khat tla bak an neih tawh loh thu hi sawiin, kar hnih hnu velah bak petrol hi phurh luh theih a nih loh tur thu a sawi nghal bawk.

Kar hmasa khan Sri Lanka chuan fuel, eitur leh damdawi lakluhna tur an neih tawh loh avangin nitin mamawh phur lirthei tan bak petrol leh diesel lak khapna an lo siam tawh a ni. Wijesekera chuan diesel tonne 12,774 leh petrol tonne 4,061 bak khawlkhawmsa an neih tawh loh thu a sawi. "July 22 leh 23-ah petrol phurhluh hman kan beisei a ni," a ti. Tun kar tawp hian diesel phurtu lawnglian chu a thleng dawn a, mahse Wijesekera chuan an ramin fuel leh crude oil lakluhna man pek tur pawisa an nei daih loh thu a sawi lawk.

Sri Lanka-a central bank chuan fuel lei nan USD mtd 125 bak an pechhuak thei lo a, fuel lo khulna atana sum mamawh zat USD mtd 587 chu a phak lo nasa hle. Wijesekera chuan supplier pasarih hnenah USD mtd 800 vel an batsak tawh tih a sawi.

Mipui mtd 22 vel chenna ram hian kum 1948-a UK aṭanga zalenna an chan hnua eibar lama an tlakchhiat ber ṭum hmachhawn mekin, rampawn aṭanga essential goods lakluhna tur foreign currency indaih lohna an tawng mek a ni.

Fuel, eitur leh damdawi tlakchhamna thleng vangin khawsak man pawh a sang tawhin record a siam tawh a ni. Ningani liam ta khan International Monetary Fund team chuan an leiba lak aṭanga khaihchhuahna tur, USD tld 3 hu pekna tura inremna siampui turin inbiakna a neihpui a, mahse inremna erawh an la siam thei lo. Inremna la siam thei chiah loh mah se inbiakna hian hma erawh a sawn zel niin an IMF team chuan a sawi. Sri Lanka mipuite'n harsatna nasa tak an tawh mek chu mit ngeia an hmuh thu leh sawiin, an ram buaina tawh mek hi a bikin mi rethei leh dinhmun chhe zawkten an tuar nasa hle a ni, an ti.