Lysychansk khawpui aṭangin Ukraine inhnukdawk Russia-in hnehna an chan thu sawi

Ukraine sipaite chu Russia sipai nena an inbeihna, an ram khawchhak Luhansk biala Lysychansk khawpui aṭangin an inhnukdawk a, Russia chuan he khawpui hi an kutah a awm pumhlum ta tih an sawi zui bawk.

Ukraine president Volodymyr Zelenskyy chuan an sipaite inhnukdawk rih mah se, an ram hi lak let leh vat a tiam

Pathianni khan ruahmanna fel tak nen an sipaite hi hnuhkir an nih thu Ukraine chuan a sawi a, hei hian sipai tam tak nunna a chhanhim phah a, khawthlang ramte ralthuam an pekte hmangin tha tharin an bei let leh dawn tih a sawi. "Ralthuam changkang leh tam zawk nen ruahmanna felfai tak nen kan rawn let leh dawn a ni," tiin, "Kan sipai, kan mite nunna venhim chu kan thupui ber pakhat a ni. Kan inhumhimna bangte sa ṭha in, ram chu kan nei let leh ang a, a pawimawh berah chuan kan mipuite kan venghim dawn a ni," tiin Zelenskyy chuan a sawi.

Lysychansk aṭanga Ukraine sipaite an inhnuhdawh tak avangin Russia sipaite hian Donetsk bial lam an thlurbing leh a, he bial hi Ukraine hnuaiah a la awm a ni. Ukraine khawpui Kyiv-a beihpui an thlak an tawpsan hnuah Russia chuan Luhansk leh Donetsk region-a Donbas lamah indona hi an thlurbing ta zawk a ni.