Turkey sorkarin official 4,000 ban leh

Turkey sorkar chuan nikum July thlaa sorkar paihthlak tuma beihnaa inhnamhnawiha puh, public official 4,000 dang a ban leh.

Sorkar hnathawk 4,000 ban belh leh zinga 1,000 chuang hi justice ministry hnuaiah thawk an ni a, army staff 1,000 vel bakah air force pilot pawh 100 chuang ban tel an ni bawk.

Hnathawktute banna thupek tihchhuah a nih rual hian, sorkar chuan TV-a dating show programme pawh tihchhuah a khap. Kar kalta khan Turkey sorkar chuan online encyclopaedia Wikipedia a lo block tawh bawk a ni.

President Recep Tayyip Erdogan chuan US-a awmhmun khuar, Islam sakhaw hruaitu Fethullah Gulen chu sorkar paihthlak tuma mawhphurtu leh fuihtu berah a puh a, official ban tharte pawh hi Gullen-a pawl nena inthlunzawmna nei vek niin a sawi.

Deputy Prime Mininster Numan Kurtulmus chuan TV-a dating programme khap a nih chungchang sawifiahin, Mrach thla khan show buatsaihtute pawh warning pek an ni tawh tih a sawi a, he programme hi Turkey nunphung nena thil inmil lo tak a ni, a ti.

Turkey Information and Communication Technologies Authority chuan Wikipedia block chungchang hi a hma in uluk taka lo ngaihtuah a ni tawh tih a sawi a, Wikipedia hnenah hian mi ṭhenkhat thuziak, Turkey-a firfiak pawl thlawpna lam thu hawite chu paih tura ngen alo ni tawh niin media-te chuan an tarlang. Mahse an ngena hi website neitu lam hian an chhan loh avangin block a ni ta tih an sawi bawk.