Kyrgyzstan-ah leiminin mi 24 chhilh

Central Asia ram, Kyrgyzstan chhim lam, Osh biala ruahsur nasa avanga leiminin khaw pakhata in paruk a chhilh a, mi 24 a an thi a, an zing­ah hian naupang pakua an tel. Leimin thlen hun hi Inrinni zing lam dar 6.40 vel a ni a, in paruk leh a chhunga chengte chu a chhilh a ni.

Kygryzstan President Almazbek Atambayev chuan nimin kha ram pumah leimin vanga thite sunna ni atan a puang nghal a ni.

District official Alisher Bakyshev chuan leiminna biala chengte hi March thla khan ruahsur vanga leimin nasa tak a thlen mai hlauhthawn thilah insawnchhuak tura hriattir an ni tawh tih sawiin, chhungkaw 34 chu a inthiarchhuak a, mahse a hnuah an zinga ṭhenkhat chu an kir leh a ni, a ti.

President Atambayev chuan chhiatna rapthlak tak thlenga thite a tuarpui thu a sawi a, hemi rual hian thingtlanga chengte chu khawchin ṭha lo avanga an awmna him tawk loa hria a, sorkarin insawnchhuak tura a ti a nih chuan zawm turin a ngen. In leh lote ai chuan nunna chu a hlu zawk tih sawiin, an thilneihte chu an nunna dinhmun derthawnga dah phah nan hmang lo turin a ngen.