Australia-a tuilian vangin mi 50,000 insawnchhuak turin ti

Australia-a khawpui lian ber Sydney-ah kumin chhunga a ṭum thumna atan tui a lian leh a, khawpuia cheng zinga mi 50,000 vel chu hmun him lama insawnchhuak turin tih an ni.

Sydney khawpui hian ni li chhungin thla riat chhunga ruahtui an dawn ṭhin zat an dawng tawh a ni. Tuilan hian kawngpuite tichhiain, chenna in ṭhenkhat chu tuiin a chim tawh bakah eng nei loin mi tam tak an khawsa mek bawk.

Australia rampuma tuilian hi La Niña weather pattern vanga thleng a ni a, kuminah mi 20 chuangin an thihphah tawh a, heng zinga mi tam zawkte chu New South Wales (NSW)-a mi te an ni.

Greater Sydney-ah chhiatna thleng vang hian insawnchhuak tura hriattirna hi vawi 100 chuang an tichhuak tawh a ni. Lui eng emaw zatah tui a len avangin area 50-a cheng mipui te chu an chenna hmun chhuahsan tura tih an ni.

Hunter leh Illawarra region pawh khawchhe nasa takin a tibuai mek a, NSW area hmun ṭhenkhatah ni li chhungin ruah 800mm vel a tla hman tih Bureau of Meteorology chuan a sawi. Greater London-in kumtin chawhruala ruahtui an dawn ṭhin zat aṭanga hmun thuma ṭhena hmun khat chu ni li chhung hian an dawng hman.

Nimin aṭang khan Sydney-a ruahsur hian ziaawm lam pan mah se, thlipui a la thawk dawn nia sawi a ni a, hei vang hian harsatna an tawh mek chu a la tawp mai dawn lo tih NSW Emergency Services Minister Stephanie Cooke chuan a sawi.