Chicago-a July 4 parade-a silaia inkahna thlengah Mi 6 an thi, Mi 30-in an hliam

Chicago, United States-a July 4-a United States Independence Day lawmna puala parade neite chu mi pakhatin inchung aṭangin silaiin a pawng kah a, mi paruk an thi a, mi dang 30 in hliam an tuar bawk.

Parade-naah hian nausen leh naupangte pawh eng emaw zat an tel a ni.

Thuneitute chuan darkar eng emaw zat an zawn hnuah, pawikhawihtu nia rinhlelh kum 22 mi chu police-ten an man tih an sawi.

US-ah hian tun hnai chhoah inpawng kahna hi a thleng fo a; school, biak-in, dawr bakah tunah community parade-ah pawikhawihna rapthlak tak hi a thleng leh ta a ni. Thawhṭannia pawikhawih hi an ram Independence Day lawma mi tam tak chhuahkhawm laia thleng a ni a, kawngzawhte lam hawi hian silai hi vawi eng emaw zat kah a ni a, kalkhawmte hi chiaiin an tlandarh nasa hle bawk.

High Park Police hotu Lu Jogmen chuan police-te'n pawikhawihtu nia rinhlelh thlalak an tihchhuah aṭanga darkar rei vak loah officer pakhatin inkahna thlenna aṭanga hmarlam mel nga vela hlaah kum 22 mi Robert E.Crimo III lo tidingin, hren zui nghal a ni tih a sawi. Police-te hian pawikhawihtu hi Crimo a ni ngei tih an la nemnghet lo a, mahse rinhlelh kai ber a nih thu leh a hming leh landan kimchang thehdarh chu hmalakna hmasaah an ngaih thu a sawi.

President Joe Biden chuan Thawhṭanni khan amah leh first lady Jill Biden chuan silai hmang pawikhawihna thleng leh, Independence Day-a America khawtlanga lungngaihna nasa tak rawn thleng chu pawi an tih thu a sawi. Pawikhawihtu zawnchhuahna kawngah chak taka hma an lak tur thu a sawi bawk.