May thlaah Mosul khua lak fel theih beisei

Iraq sipaiten Islamic State (IS) firfiak kut aṭanga an ram khawpui pawimawh, Mosul khua laklet tuma an beih mek chu May thlaah lakfel theih an beisei thu army chief of staff, Lieutenant General Othman al-Ghanmi chuan a sawi.

Lt Gen al-Ghanmi chuan khawpui chu kar thum chhungin firfiakte kut aṭangin an la fel thei tawh dawn niin a sawi. Mosul khawchhak lam bial hi sipaite kutah a awm tawh a, khaw­thlang lam bialah firfiakte nen hian an la inbei mek a ni. US kaihhruai ṭangrual ramte chu Iraq sipaite hi an pui bawk.

Mosul khawpui hi kum 2014 June thla khan IS firfiakte hian Iraq sipaite kut aṭangin an la a ni. Mahse khawpui laklet tumin nikum October thla aṭang khan Iraq sipaite chuan beihpui an thlak a, hun rei tak sipai leh firfiakte an inbeih tawh avangin khawpui chhunga cheng mi nuai nga vel chu an dinhmun a ṭha tawh lo hle nia sawi a ni.

Iraq sipaite chuan Mosul khaw chhungah hian IS firfiak hi 200-300 vel chauh an awm tawh niin an sawi a, an zinga a tam zawk chu ramdang mi niin an sawi bawk. Sipaiten beihpui an thlak tirh khan firfiak hi 6,000 vel an awm nia chhut a ni.

Pathianni khan IS firfiakte hian Mosul hmarthlang lama Shiite paramilitary force te beiin, Akashat-a Iraq army post an bei leh a, Iraq sipaite chuan firfiakte hi lo nawr letin, pariat an kaphlum niin an sawi.