Nepal Chief Justice ban tum

Nepal Parliament-ah rorellai party pahnih chuan an ram Chief Justice Sushila Karki-i banna tur motion an pu lut.

Sushila Karki-i hi hmeichhia zinga Nepal Chief Justice ni thei hmasa ber a ni. Mahse sorkar rorelna leh thu­tlukna siam kawngah a inrawlh nasa nia puhin, rorellai party pahnih Nepal Congress leh CPN (Maoist Centre) chuan paihthlak a nihna tur motion hi an pu lut a ni.

Kum 64 mi, Karki-i hi motion putluh a nih aṭang hian a hna aṭangin suspend nghal a ni bawk.

Chief Justice banna tur motion putluhah hian NC leh CPN MP 249 ten an hming an ziak a ni.

Nepal police hotu, Inspector Ge­neral of Police tur ruat chungchangah Nepal sorkar leh Supreme Court chu an thu a inhmu lo a, hetihlai hian he post chelhtu atana ruat hnathawh dan endikna chu Karki-i hi a khawih danglam nia puh a ni. Hei vang hian rorellai party-te chu Karki-i chungah hian an lungawi lo hle.

Hetihlai hian Nepal Deputy Prime Minister leh Minister for Home Affairs Bimalendra Nidhi chu a hriatpui loha Chief Justice banna tur motion putluh anih avang hian lungawi loin, Pathianni khan banna a thehlut. Nidhi chuan, SJ banna tur putluh chung­changah hian rawn a ni lo tih a sawi a, he thil hi IGP ruat kaihhnawih thil niin a sawi bawk.