Britain PM hluiTony Blair-an politics khelh leh dawn

Britain Prime Minister hlui Tony Blaire chuan politics luhchilh leh a tum thu a puang.

Prime Minister hlui Tony Blair hi kum 1994-2007 inkar khan Labour Party hruaitu a ni a,kum 1997 aṭang khan kum sawm chhung PM dinhmun hi chelhin, a ban hnuah politics lam pawh a chawlhsan zui a ni. Mahse Pathianni khan politics luhchilh leh a tum thu hi a puang.

Kum 63 mi, Blair hian Britain-in European Union chhuahsan tuma inbiakna bul ṭan a tum mekah, EU chhuahsan hi an ram tan a ṭha lo zawk dawn tih sawiin, politics hi khelh leh a tum phah niin a sawi. A thil tum avang hian sawiselna pawh a tawk nasa dawn hle tih pawh a hriat thu a sawi bawk.

Blair chuan, Britain in dinhmun khirh tak a hmachhawn mekah ngawi renga lo thlir liam chu a theih loh thu a sawi a, EU chhuahsan chu dodal a tum ngawr ngawr lo tih a sawi rualin, European single market leh free trade agreement chhuahsan chuan dinhmun sang tak aṭanga hniam takah an ram chu a pawhthlak tur thu a sawi. Hei vang hian an hmalam awmdan tur chu ruahmanna fel tak siam a ngai niin a sawi.