Venezuela President-in ram danpui siamthar tum

Venezuela President Nicolas Maduro-a chuan an ram danpui siamthar a tum a, hemi atan hian danpui thar duangtu tur constituent assembly pawh din a nih tur thu a sawi.

Venezuela khawpui, Caracas-a May Day rally neihnaah President Maduro chuan an ram politics buaina chinfel a ngaih thu sawiin, hma lam pana an kal a hun tawh a, hei vang hian ram danpui siamthar loh chu thlan tur dang a awm lo tih a sawi.

Ram danpui siam thar tur hi kawng thuma kalpui a ni dawn a, a hmasa berah mipuiten an t hlawp em tih ngaihdan lak a ni phawt dawn a, thlawptu an tam zawk chuan dan thar duangtu tur member 500 awmna constituent assembly din a ni ang a, anni hian public power ṭhiahna leh inthlanpui buatsaih turin thuneihna an nei ang. Hemi hnu hian assembly-in danpui thar tura a duante hi mipuite an pawmpui em tih vote lak a ni leh dawn a ni.

Maduro chuan Education Minister Elias Jaua Milani kaihhruaiin hma lak a ni dawn tih a sawi a, an ram ṭhatna tura theihtawp chhuahpui vek turin mipuite a sawm.

Hetih lai hian eptu pawl lam chuan President Maduro thil tum ram danpui dik lo taka siam a, a thuneihna pumhmawm a tumna niin an puh. National Assembly President Julio Brogs chuan mipuite chu sorkar duhlohna lantir a, kawngpuite dan chhunzawm zel turin a chah thung.