Kawngzawhnaah SAfrica President au el

South Africa rama May Day rally neihnaah hnathawktu kalkhawmte chuan an ram president Jacob Zuma chu bang tura phutin an au el a, eptu pawl leh president thlawptute inkarah buaina chhuak zuiin, thu sawi tura ruatte pawh ṭhulh leh vek a ni.

SAfrica rama labour federation lian ber, Cosatu chuan Zuma hian a finance minister a ban avangin president a nihna aṭanga bang turin an lo phut tawh a ni.

Bloemfontein khuaa rally-a tel mipuiten President hi an au el avang­in Zuma hian hmanhmawh takin podium a chhuahsan a, a motor-in tlan chhuahpui nghal a ni. South African Trade Union chuan a hma aṭangin rally-a President Zuma tel tur hi alo dodal tawh a ni.

President Zuma hian March thla khan financ minister Pravin Gordhan a ban a, Gordhan hi an ram mipuite zah kai tak a nih avangin ban a nih avang hian mipuite chu President chungah hian an lungawi lo hle a, bang turin an nawr fo a ni. Eptu pawlte chuan Zuma hi eiruknaah a inhnamhnawh nasat avangin a cabinet a siksawi chhan pawh hi amah leh a thurualpuiten sorkar sum an ei theihna tur remchang a ngaihtuah niin an puh.

Nikum khan court chuan kum 1999-a ralthuam lei chungchangah eiruk thubuai siamsak turi a ti a, mahse court thutlukna hi Zuma hian a khing let a ni. Nikum vek khan South Africa-a court sang ber chuan President hian a mimal in chenna chei ṭhat nan sorkar sum a hmante pe kir tura a hriattirna a zawm loh avangin lakluh a nih dawna a thu­tiam lakte a bawhchhia niin a sawi.

Zuma hi kumin December thla khian rorellai, African National Congress (ANC) party hruaitua nihna aṭangin a chawl dawn a, a president term hi kum 2019-ah a zo bawk ang.